Vous-êtes ici: AccueilActualités2021 05 24Article 450932

BBC Hausa of Lundi, 24 Mai 2021

Source: BBC

Mandzukic zai bar AC Milan saboda yawan jinya

Mario Mandzukic Mario Mandzukic

Mario Mandzukic ya sanar zai bar AC Milan, sakamakon raunin da yake ta yi, bayan wata shida da ya yi a kungiyar ta Italiya.

Mai shekara 35 dan kasar Croatia ya koma Milan a matakin wanda bai da kungiya a watan Janairu da yarjejeniyar da zai kare a karshen kakar 2020/21.

''Abin alfahari ne da na buga tamaula a AC Milan - Ina godiya ga mahukuntan kungiyar bisa damar da suka bani da koci da abokan taka leda da suka bani gagarumar gudunmawa.

Dan wasan ya rubuta a kafarsa ta sada zumunta a Instagram ''Na yi farin ciki da muka kai kungiyar gasar Champions League da za a buga a badi gurbin da ya kamace ta - ina yi wa dukkan kowa da kowa fatan alheri''.

Mandzukic ya buga wa Milan wasa 11 a dukkan fafatawa, wadda ta kare Serie A ta bana a mataki na biyu, sai dai dan kwallon ya yi kusan wata biyu yana jinya.

Milan ta karkare kakar bana a mataki na biyu ne, bayan da ta je ta doke Atalanta da ci 2-0 ranar Lahadi a wasan mako na 38 a gasar Serie A.

Juventus wadda ta lashe kofin Serie A tara a bara na bana ya gagareta ta kammala kakar bana a mataki na hudu, bayan da ta je ta ci Bologna 4-1 ranar Lahadi.

Inter Milan ce ta lashe kofin Serie A na bana.