Sergio Aguero ya kusan komawa Barcelona

Sergio Aguero ya kusan komawa Barcelona da zai buga wa tamauala a badi in ji kocin Manchester City, Pep Guardiola.

Aguero, mai shekara 32 zai bar Etihad idan yarjejeniyarsa ta kare a karshen kakar bana.

Dan wasan tawagar Argentina, ya ci wa Manchester City kwallo 260 a wasa 389 da ya buga mata.

''Watakila na bayyana sirri, kamar yadda Guradiola ya shaidawa BBC. Watakila ya kusan amincewa da kwantiragi a Barcelona.

''Zai je ya buga tamaula tsakanin fitattun 'yan wasan da suka shahara kamar Messi.''

Guardiola ya kara da cewar ''Ina da tabbacin zai ji dadin taka leda a kungiyar. Kuma watakila Barcelona za ta kara karfi a wasanninta tare da Aguero.''

Aguero ya buga wa City wasan karshe ranar Lahadi inda ya ci Everton kwallo biyu a karawar karshe a gasar Premier League ta bana.

Aguero ya koma Manchester City a kakar 2011 daga Atletico Madrid wadda ya yi wa wasa tsakanin 2006-11.

Ya koma taka leda a Spaniya daga Independiente wadda ya yi kaka uku da ita yana murza leda.