Mbappe ya ci kwallo 23 a gasar Ligue 1 ta bana

Paris St Germain ta yi nasarar doke Saint Etienne da ci 3-2 a wasan mako na 33 a gasar Ligue 1 ta Faransa da suka fafata ranar Lahadi.

Saint Etienne ce ta fara cin kwallo ta hannun Denis Bouanga saura minti 13 a tashi daga wasan.

Sai dai minti biyu tsakani PSG ta farke ta hannun Kylian Mbappe, sannan ya kara na biyu saura minti 11 a tashi daga fafatawar.

A minti na 90 ne St Etienne ta farke wasa ya koma 2-2, nan da nan PSG ta kara na uku ta hannun Mauro Icardi da hakan ya sa ta hada maki ukun da take bukata.

Kwallo biyun da Mbappe ya ci a ranar Lahadi ya ci gaba da zama na daya a yawan zura kwallaye a raga a gasar ta Faransa mai 23 a raga a wasa 28 da ya yi a bana.

Da wannan sakamakon PSG tana ta biyu a teburin Ligue 1 da tazarar maki daya tsakaninta da Lille mai jan ragama mai maki 70.

PSG ta kai karawar daf da karshe a gasar Champions League a bana, za kuma ta fafata da Manchester City a wasan zagayen gaba.

Kungiyar ta Faransa wadda ba ta taba lashe Champions League ba, ta kai wasan karshe a bara, inda Bayern Munich ta yi nasara da ci 1-0 ta kuma ci kofi na shida jumulla.

Jerin wadan da ke kan gaba a cin kwallaye a Ligue 1 ta bana:

1. Kylian Mbappe PSG 23



2. Wissam Ben Yedder Monaco 17



3. Memphis Depay Lyon 16



4. Boulaye Dia Stade Reims14



5. Kevin Volland AS Monaco FC13



6. Karl Toko Ekambi Lyon 12



7. Moise Kean PSG 12



8. Ludovic Ajorque RC Strasbourg 12



9. Andy Delort HSC Montpellier 12



10. Amine Gouiri OGC Nice 11



11. Terem Moffi Lorient 11



12. Ui-jo Hwang Bordeaux 11