Atletico Madrid ta dage sai ta lashe La Liga na bana

« Pre

Suiv »

Commentaires (0)

Écoutez l'article

Atletico ta yi nasarar doke Osasuna da ci 2-1 a wasan mako na 37 a La Liga

Atletico Madrid na daf da lashe kofin La Liga na bana kuma a karon farko a shekara bakwai.

Atletico ta yi nasarar doke Osasuna da ci 2-1 a wasan mako na 37 a gasar ta Spaniya da suka fafata ranar Lahadi.

Sai dai wasan ya kusan zuwa da tangarda, inda Osasuna ta fara zura kwallo ta hannun Ante Budimir, a lokacin Real Madrid na cin Athletic Bilbao 1-0.

Daga baya ne Atletico ta farke ta hannun Renan Lodi, sannan Luis Suarez ya ci na biyu daf da za a tashi daga karawar.

Ta kuma ci kwallayen biyu ne a cikin minti 10 na karshen fafatawar, bayan da aka fara hangen kila ta barar da damar lashe kofin Spaniya na bana.

Tun cikin watan Nuwamba Atletico ta fara dakon teburin La Liga har ta kai ta bayar da tazarar maki 10 tsakani daga baya ta ci karo da cikas.

Atletico ta yi fama da 'yan wasanta musamman masu ci mata kwallaye da suka je jinya, sannan cutar korona ta ci gaba da kama wasu 'yan wasa da dole suka killace kansu.

Barcelona wadda aka yi tunanin tana cikin 'yan takarar La Liga na bana kuma na biyar a kaka bakwai ta yi rashin nasara a hannun Celta Vigo da ci 2-1 a Camp Nou.

Da wannan sakamakon Atletico ta ci gaba da zama ta daya a kan teburi da maki 83, Real ta biyu mai 81, yayin da Barcelona keda 76 da kuma Sevilla ta hudu mai 74.

Sakamakon karawar mako na 37 a gasar La Liga ranar Lahadi: