BBC Pidgin of Thursday, 1 April 2021
Source: BBC
By now, plenti of your friends go don dey engage, or even marry or travel.
Or na April Fool dem dey do you?
If you look Facebook or WhatsApp(mostly) dia messages go don yapa as dem go dey try fool you. Abi na you dey even send pipo sef.
For 1st of April everi year, pipo for most parts of di world sabi am as April Fools' Day. But many pipo no know how e take begin.
Plenti pipo don do research on how e take start for world but no pesin fit get wetin start dis whole craze.
English Poet
One wey you fit don hear about am na from one poem from English poet Geoffrey Chauncer for di 14th century of fox wey play chicken wayo come almost chop am for di book The Canterbury Tales. For one line, di poet use March 32, wey pipo feel say na joke because March 32 no dey.
Dutch pipo
One of di first pipo to do April Fool fit be pipo for Holland. Book dem from 1561 show Dutch writers dey call April 1 as 'fool's errand day.'